Мэдээ мэдээлэл - Төв аймаг

Тариалалтыг дэмжих зорилгоор 10 мянган тонн шатахуун нөөцөлжээ

zulaa — Mon, 13 Apr 2026 15:28:41 +0800

Хаврын тариалалтыг технологит хугацаанд хэвийн явуулах зорилгоор 16 тэрбум төгрөгийн санхүүжилтийг шийдвэрлэж, 10 мянган тонн шатахууны нөөцийг бүрдүүллээ.

Нэг литр шатахууныг 3400 төгрөгөөр нийлүүлэх ажлыг Аж үйлдвэр, эрдэс баялгийн яамтай хамтран 2026 оны 4 дүгээр сарын 8-наас эхлүүлээд байна.

Энэ нь тариаланчдын зардлыг бууруулж, тариалалтын явцыг тогтвортой хангах чухал нөхцөл болж байна.

Хулгайн зөрчил дөрөв дахин өсжээ

zulaa — Wed, 08 Apr 2026 14:24:35 +0800

Улсын хэмжээнд энэ оны нэгдүгээр улирлын байдлаар нийт 2,075,502 зөрчил бүртгэгдсэн нь өмнөх оны мөн үетэй харьцуулахад 14.9 хувиар өссөнийг Улсын Ерөнхий Прокурорын Газраас мэдээлэв.

Бүртгэгдсэн нийт зөрчлийн:

88.8 хувь нь нийслэлд,
12.2 хувь нь орон нутагт үйлдэгджээ.

Үүнээс 99.5 хувийг цагдаагийн байгууллага, 0.5 хувийг Гааль, Татвар, Гадаадын иргэн, харьяатын газар, Онцгой байдлын газар зэрэг бусад байгууллагын эрх бүхий албан тушаалтнууд шалган шийдвэрлэсэн байна.

2026 оны I улирлын байдлаар зөрчил гаргасан 1,971,456 хүн, 81,861 хуулийн этгээдэд нийт 45.5 тэрбум төгрөгийн торгох шийтгэл оногдуулжээ.

Зөрчлийн хэрэг бүртгэлтийн ажиллагааны явцад нийт 6,988 хүнд эрх хязгаарлах арга хэмжээ авснаас 5,861 хүнийг саатуулах, 120 хүнээс баримт бичгийг хураан авах, долоон аж ахуйн нэгжийн үйл ажиллагаа, ашиглалтыг түр зогсоох эрх хязгаарлах арга хэмжээг авчээ.

Зөрчлийн улмаас хүн, хуулийн этгээд, төр, нийтийн ашиг сонирхолд 22.2 тэрбум төгрөгийн хохирол учирч 6.6 тэрбум төгрөгийн хохирлыг зөрчил шалган шийдвэрлэх ажиллагааны явцад нөхөн төлүүлсэн байна.

Зонхилон үйлдэгдсэн зөрчлийг өмнөх оны мөн үетэй харьцуулахад замын хөдөлгөөний аюулгүй байдлын тухай хууль зөрчих зөрчил 1.5 дахин, танхайрах зөрчил хоёр дахин, гэр бүлийн хүчирхийлэлтэй тэмцэх тухай хууль зөрчих зөрчил 19.2 хувиар, хулгайлах зөрчил дөрөв дахин өссөн байна.

Харин олон нийтийн газарт зүй бусаар биеэ авч явах зөрчил 38.9 хувиар, хүний биед халдах зөрчил 10 хувиар, оршин суугчдын амгалан тайван байдлыг алдагдуулах зөрчил 3.6 хувиар, хүүхдийн эрхийг зөрчих зөрчил 36.9 хувиар тус тус буурчээ.

Б.Энхбаяр кино шиг бичлэгээ АТГ дээр ирж үзээрэй

zulaa — Tue, 31 Mar 2026 12:24:04 +0800

МАН-ын Бага хурал үргэлжилж байна. Энэ үеэр Бага хурлын гишүүн Б.Цогтгэрэл "Б.Энхбаяр аа, хоёр цагийн бичлэгийг чинь Даваа гаригт АТГ-д аваачиж өгнө. Юун кино. Бодит үйл явдал болсон байна. 2024 оны дөрөвдүгээр сард Тусгаар тогтнолын ордны зүүн жигүүрийн гурван давхарт Хууль зүй, дотоод хэргийн яамнаас (ХЗДХЯ) авсан найман тэрбум төгрөгийг нэр бүхий хүмүүс хувааж авсан байж болзошгүй асуудлыг АТГ-д шалгуулна. Тусгаар тогтнолын ордон авлига, албан тушаал өгөлцөж авалцдаг газар болсон байна" гэх байр суурийг илэрхийллээ.

Тодруулбал тэрбээр, "нэг жилийн өмнө би Монгол Улс нийгэм, эдийн засаг, улс төрийн гүн хямралд орж байна гэж анхааруулж байсан. Өнөөдөр ч энэ байр сууриндаа хэвээр байна. МАН-ын Тусгаар тогтнолын ордон бол авлига, албан тушаалын хэргээс ангид байх ёстой газар. Гэвч өнөөдөр энэ орчин авлига, ашиг сонирхлын солилцооны төв болсон гэж харж байна.

Би энэ асуудлыг Бага хурал дээр нээлттэй хэлж, “шүгэл үлээх” гэж байна. ХЗДХЯ-тай холбоотой ойролцоогоор 8 тэрбум төгрөгийн хэмжээний, бусдад давуу байдал олгосон байж болзошгүй авлигын шинжтэй үйл явдлын талаар баримттай мэдээлэл байгаа. Тодруулбал, 5 тэрбум, 1–2 тэрбум, мөн 965 сая төгрөгийн гүйлгээтэй холбоотой асуудлууд дурдагдаж байна. Мөн 2024 оны дөрөвдүгээр сард Тусгаар тогтнолын ордны зүүн жигүүрт камерын бичлэгтэй холбоотой асуудал гарсан. Тухайн мөнгөний зарцуулалт, хуваарилалттай холбоотой байж болзошгүй нөхцөл байдлыг шалгах шаардлагатай гэж үзэж байна.

Хэрэв шаардлагатай бол холбогдох бичлэг болон баримтыг ирэх Даваа гарагт 11:00 цагт АТГ-т хүлээлгэн өгч, шалгуулахад бэлэн байна. Энэ бол зохиомол зүйл биш, бодит үйл явдал гэж үзэж байгаа.

Мөн “МГЛ” корпорацын Нямжав гэх хүн хохирогч байж болзошгүй гэж харж байна. Түүнийг дарамталсан, сүрдүүлсэн, албан тушаалтнуудтай холбоотой байж болох нөхцөл байдал ажиглагдаж байна. Эцэст нь хэлэхэд, эдгээр асуудлыг хууль, хяналтын байгууллага бүрэн шалгаж, үнэн зөвийг тогтоох ёстой. Би энэ бүхнийг Бага хурал дээр ил тод хэлж, баримтуудаа дэлгэнэ. Шүгэл үлээх болно" гэв.

Улсын дугааргүй хөдөлгөөнд оролцвол 25 мянган төгрөгөөр торгоно

zulaa — Wed, 25 Mar 2026 17:27:57 +0800

Тээврийн хэрэгслийн улсын дугааргүй замын хөдөлгөөнд оролцсон зөрчлүүдийг телекамерын ухаалаг системийн тусламжтайгаар илрүүлж, зөрчлийг арилгуулж байна.

Тээврийн хэрэгслийн улсын дугааргүй замын хөдөлгөөнд оролцвол Зөрчлийн тухай хуулийн 14.7.12 дах хэсэгт зааснаар 25 нэгж буюу 25,000 төгрөгөөр торгож, хариуцлага тооцно.

Иймд жолооч та бүхэн замын хөдөлгөөний дүрмийг баримтлан бусдад хүндэтгэлтэй хандаж, хөдөлгөөнд соёлтой оролцохыг зөвлөж байна.

Зохиолчид хиймэл оюун бүтээлүүдийг нь зөвшөөрөлгүй ашиглаж байгааг эсэргүүцэн “хоосон” ном хэвлүүлжээ

zulaa — Wed, 11 Mar 2026 12:02:36 +0800

Мянга мянган зохиолч хиймэл оюуны компаниуд тэдний бүтээлийг зөвшөөрөлгүй ашиглаж байгааг эсэргүүцэн “Don’t Steal This Book” нэртэй “хоосон” ном хэвлүүлжээ. Тус номд 10 мянга орчим зохиолч нэгдсэн бөгөөд номын агуулга нь зөвхөн тэдний нэрсийн жагсаалтаас бүрдсэн байна. Уг бүтээлийг Лондонгийн номын яармагт оролцогчдод тараахаар бэлтгэжээ.

Энэхүү эсэргүүцэл нь Их Британийн Засгийн газар зохиогчийн эрхийн тухай хуульд өөрчлөлт оруулах талаар хэлэлцэж буйтай холбоотой юм. Засгийн газар гуравдугаар сарын 18 гэхэд эдгээр өөрчлөлтийн эдийн засгийн нөлөөллийн үнэлгээг танилцуулах ёстой. Уран бүтээлчид AI компаниуд тэдний бүтээлийг хэрхэн ашиглаж байгаад ихээхэн бухимдалтай байгаа юм.

Номын санаачлагч Эд Ньютон-Рексийн хэлснээр хиймэл оюуны салбар зөвшөөрөлгүй, төлбөргүйгээр ашигласан уран бүтээлүүд дээр тулгуурлан хөгжсөн байна. Тэрээр генератив AI нь өөрийг нь сургахад ашигласан бүтээлийн эзэдтэй шууд өрсөлдөж, уран бүтээлчдийн орлогыг бууруулж байна гэж анхааруулжээ. Тиймээс Засгийн газар уран бүтээлчдийг хамгаалах ёстой гэж тэрээр үзэж байгаа аж.

Энэхүү номд Мик Херрон, Мэриан Кийс, Дэвид Олузога, Малори Блэкман зэрэг олон зохиолч нэрээ оруулсан байна. Тэд AI компаниуд зохиолчдын номыг ашиглаж байгаа бол зохих төлбөр төлөх ёстой гэж мэдэгджээ. Номын арын нүүрэн дээр “Засгийн газар AI компаниудад ашигтай байхын тулд номын хулгайг хуульчлах ёсгүй” гэж бичсэн байна.

AI технологи нь чатбот, зураг үүсгэгч зэрэг хэрэгсэл хөгжүүлэхийн тулд асар их хэмжээний өгөгдөл ашигладаг бөгөөд үүнд зохиогчийн эрхээр хамгаалагдсан бүтээлүүд ч багтдаг. Энэ нь дэлхий даяарх уран бүтээлчид болон компаниудын дунд маргаан үүсгэж, олон шүүхийн хэрэг гаргахад хүргэсэн. Жишээлбэл, Anthropic компани зохиолчдын бүтээлийг зөвшөөрөлгүй ашигласан гэх хэргийг шийдвэрлэхийн тулд 1.5 тэрбум ам.долларын тохиролцоо хийжээ.

Их Британийн засгийн газар AI компаниудад зохиогчийн эрхтэй бүтээлийг эзэмшигч татгалзаагүй тохиолдолд ашиглах боломж олгох санал гаргасан нь уран бүтээлчдийн хүчтэй эсэргүүцэлтэй тулгарчээ. Дуучин Элтон Жон зэрэг уран бүтээлчид энэ бодлогыг шүүмжилсэн байна. Мөн Засгийн газар одоогийн нөхцөлийг хэвээр үлдээх, лиценз шаардлагатай болгох зэрэг өөр хувилбаруудыг хэлэлцэж байгаа аж.

Засгийн газрын хэвлэлийн төлөөлөгч “Бид хүний бүтээлч чадварыг үнэлж, хамгаалсан, итгэл төрүүлэхүйц, мөн инновацыг дэмжсэн зохиогчийн эрхийн тогтолцоог бий болгохыг хүсэж байна. Энэ асуудлаар бүтээлч салбартай нягт хамтран ажиллаж, гуравдугаар сарын 18-нд парламентэд шинэчилсэн мэдээлэл өгнө” гэж мэдэгдсэн байна.

Европ дэлхийн хамгийн том зэвсгийн импортлогч болжээ

zulaa — Wed, 11 Mar 2026 10:10:15 +0800

Дэлхийн даяар нөхцөл байдал хурцдаж байгаа тул зэвсгийн худалдаа эрчимтэй өсөж байна. Стокхолмын Олон улсын энх тайвны судалгааны хүрээлэнгийн (SIPRI) шинэ тайланд дурдсанаар, сүүлийн таван жилд дэлхийн зэвсгийн нийлүүлэлт өмнөх таван жилтэй харьцуулахад 10 хувиар өсжээ.

1980-аад оны сүүл, 1990-ээд оны эхээр коммунизм нуран унаж, Хүйтэн дайн дууссаны дараа зэвсгийн худалдаа 30 орчим хувиар буурсан байдаг. Харин одоо зэвсгийн худалдааны хэмжээ буцаад 1989 оны үеийн түвшинд ирэв.

Тус тайлангаас харвал Европ зэвсгийн хамгийн том импортлогч бүс болжээ. Харин 2016-2020 оны хооронд Ази-Номхон далайн бүс нутаг (нийт импортын 42 хувь), Ойрхи Дорнод (32 хувь) тэргүүлж байсан юм. Тухайн үед Европ нийт зэвсгийн импортын 12 хувийг хийж гуравт жагсдаг байжээ.

Европ тэр үеэс хойш зэвсгийн импортоо гурав дахин нэмэгдүүлжээ. Тодруулбал 2025 онд Европын дэлхийн нийт зэвсгийн импортын 33 хувийг хийсэн байна. Европын араас Ази-Номхон далайн бүс (31 хувь), Ойрхи Дорнод (26 хувь) импортоороо жагссан юм.

“SIPRI”-ийн судалгааг хамтран бичсэн Мэтью Жорж "Европын орнууд руу чиглэсэн зэвсгийн урсгал огцом нэмэгдсэн нь дэлхийн зэр зэвсгийн худалдааг бараг 10 хувиар өсгөлөө" гэжээ.

2022 онд ОХУ Украин руу довтолж дайн эхлүүлсэн нь Европ зэвсгийн худалдан авалт нэмэгдүүлэх гол шалтгаан болсон. Жорж энэ талаар ярихдаа "Европын ихэнх улс орнууд ОХУ-аас ирж буй аюул заналхийллийн эсрэг цэргийн хүчин чадлаа бэхжүүлэхийн тулд зэвсэг ихээр импортолж эхэлсэн" гэсэн юм.

“SIPRI”-ийн мэдээлснээр, 2025 онд АНУ-аас Украинд нийлүүлсэн зэвсгийн хэмжээ өмнөх хоёр жилтэй харьцуулахад мэдэгдэхүйц буурчээ.

Зургийн эх сурвалж: Wilson Center

Доналд Трамп Цагаан ордонд эргэн ирснээсээ хойш Киевт үзүүлэх цэргийн тусламжаа багасгасан. Хэрэв Европын Холбооны орнууд, Австрали эсвэл Канад зэрэг Украины холбоотнууд АНУ-аас худалдан авсан зэвсгээ Украин руу илгээснийг “SIPRI” үүнийг АНУ-аас Украинд хийсэн экспорт гэж тооцдог. Гэсэн ч АНУ-аас Украин руу нийлүүлэх зэвсгийн хэмжээ буурсан гэх тооцоолол гарчээ.

Европ дахь зэвсгийн импортын өсөлтийн цорын ганц шалтгаан нь Украин байхаа больсон байна. ОХУ-аас үзүүлж буй аюул занал болон Трампын Европын орнуудад үзүүлж буй шахалтаас болж НАТО-гийн гишүүн орнуудын зэвсгийн эрэлт нэмэгджээ. “SIPRI”-ийн тайланд дурдсанаар, НАТО-гийн Европ дахь 29 гишүүний зэвсгийн импорт 2021-2025 оны хооронд өмнөх таван жилтэй (2016-2021) харьцуулахад 143 хувиар өссөн байна.

Украин болон Беларусьтай хиллэдэг Польш НАТО-гийн Европ дахь гишүүд дундаас хамгийн том зэвсэг импортлогч болжээ. Тус улс Европын зэвсгийн нийт импортын 17 хувийг эзэлж байна. Энэ нь дэлхийн нийт зэвсгийн импортын 3.6 хувь юм. Польшийн зэвсгийн импорт 2021-2025 оны хооронд өмнөх таван жилтэй харьцуулахад 852 хувиар өссөн байна.

2025 оноос хойш зэвсгийн нийлүүлэлт буурсан ч АНУ Украинд зэвсэг нийлүүлэгч хамгийн чухал орон хэвээр байна. Харин хоёр дахь хамгийн чухал нийлүүлэгч нь Өмнөд Солонгос байсан юм. Герман Украинд их хэмжээгээр зэвсэг нийлүүлж эхэлснээр дэлхийн дөрөв дэх том зэвсэг экспортлогч болж, БНХАУ-ыг гүйцжээ.

Эх сурвалж: DW

Онлайнаар валют солиулах нь "ЦАХИМ ЗАЛИЛАН"-д өртөх эрсдэлийг нэмэгдүүлдэг

zulaa — Mon, 02 Mar 2026 18:43:57 +0800

Сүүлийн жилүүдэд цахим орчин дахь зар, пост, мессежээр дамжуулан “Валют солино”, “Доллар өндөр ханшаар авна”, “Шуурхай валют арилжина” гэх мэт зар байршуулж, иргэдийг залилан мэхлэх тохиолдол эрс нэмэгдэж байна. Өнгөрсөн онд л гэхэд цагдаагийн байгууллагад цахим орчинд “Валют солино” гэх зарын дагуу 68 иргэн залилуулсан тохиолдол бүртгэгджээ.

Ялангуяа олон нийтийн сүлжээ, зарын групп, мессенжер аппликейшнээр дамжуулан богино хугацаанд ашиг олох, зах зээлийн ханшаас илүү ашигтай санал тавих зэргээр итгэл төрүүлж, мөнгийг нь шилжүүлэн авч алга болох хэлбэр зонхилж байна.

Энэ төрлийн залилан хэрхэн явагддаг вэ?

Ихэнх тохиолдолд залилангийн схем дараах байдлаар өрнөдөг.

Залилагч этгээд цахим орчинд “Валют солино” гэх зар байршуулж, зах зээлийн ханшаас арай өндөр, эсвэл хэт ашигтай санал тавина.
Иргэн холбогдоход “шилжүүлгээ эхэлж хий”, “би гадаадад байгаа тул онлайн гүйлгээгээр хийнэ” гэх мэт шалтгаан хэлж, мөнгийг нь урьдчилж шилжүүлэхийг шаарддаг.
Мөнгө шилжүүлсний дараа холбоо таслах, хаягаа устгах, өөр нэр, өөр данс ашиглах зэргээр мөрөө балладаг.

Зарим тохиолдолд хуурамч иргэний үнэмлэх, банкны баримт, гадаадын валютын зураг илгээж итгэл төрүүлэхийг оролддог. Мөн “гадаад руу яаралтай гуйвуулах шаардлагатай”, “гадаадаас валют оруулж ирсэн” гэх мэт яаруулсан тайлбар ашигладаг нь нийтлэг байна.

Валют солих нэрийдлээр залилуулсан тохиолдлууд

“Юань зарна” гэх зарын дагуу холбогдож, 58 сая төгрөгөө залилуулжээ

2026 оны нэгдүгээр сарын 28-ны өдөр иргэн А нь цахим орчинд байршуулсан “Юань зарна” гэх зарын дагуу өөрийн харилцах данснаас 58.000.000 төгрөгийг валют болгон солиулахаар шилжүүлж, залилуулжээ. Энэ талаарх дуудлагыг цагдаагийн байгууллага бүртгэж, шалгаж эхэлсэн байна.

Валют солиулахаар 244 сая төгрөг шилжүүлж, залилуулжээ

Энэ оны нэгдүгээр сарын 18-ны өдөр "Валют солиулахаар мөнгө шилжүүлж, залилуулсан" гэх гомдол мэдээлэл цагдаагийн байгууллагад бүртгэгдсэн. Уг гомдол мэдээллийн дагуу цагдаагийн байгууллагаас шалгалтын ажиллагааг явуулахад иргэн М нь Чингэлтэй дүүргийн нутаг дэвсгэрт байхдаа зургаан удаагийн гүйлгээгээр 244 сая төгрөгийг бусдад шилжүүлж, залилуулсан байна. Цагдаагийн байгууллагаас шуурхай арга хэмжээ авч, 123 сая төгрөг байршиж байсан холбогдох дансанд барилт хийж уг хэргийг үргэлжлүүлэн шалгаж байна.

Яагаад энэ төрлийн залилан нэмэгдэж байна вэ?

Валютын ханшийн хэлбэлзэл, гадаад гүйлгээний эрэлт нэмэгдэх
Цахим орчны хяналт сул, хуурамч аккаунт нээх амархан
Иргэд “ашигтай ханш” хайж, албан бус сувгийг сонгох хандлага

Монгол Улсад валют арилжаа эрхлэх нь хууль, журмаар зохицуулагдсан үйл ажиллагаа бөгөөд зөвхөн тусгай зөвшөөрөлтэй банк, санхүүгийн байгууллага гүйцэтгэх ёстой. Гэвч хувь хүн, нэр нь тодорхойгүй цахим хаягаар дамжуулан валют солих оролдлого хийж байгаа нь өөрөө өндөр эрсдэлтэй үйлдэл юм.

Иргэд юуг анхаарах ёстой вэ?

Валют солилцоог зөвхөн баталгаатай сувгаар хийх.
Арилжааны банк, албан ёсны валют арилжааны цэгийг сонгох нь хамгийн аюулгүй арга юм.
Хувь хүнээр, онлайнаар валют солихоос татгалзах.
Танихгүй этгээдтэй цахимаар харилцан, урьдчилгаа шилжүүлэг хийх нь залилангийн эрсдэлийг нэмэгдүүлдэг.
Хэт ашигтай саналд болгоомжтой хандах.
Зах зээлийн ханшаас огцом зөрүүтэй “ашигтай” санал ихэнхдээ луйврын дохио байдаг.
Мөнгө шилжүүлэхээс өмнө нягтлах.
Данс эзэмшигчийн нэр, байгууллагын бүртгэл, тусгай зөвшөөрлийг шалгах.
Залилангийн шинж илэрвэл мэдээлэх.
Цагдаагийн байгууллага болон холбогдох байгууллагад даруй мэдэгдэж, баримт мэдээллийг хадгалан үлдээх.

Валют арилжаа нь санхүүгийн өндөр эрсдэлтэй үйл ажиллагаа тул “ам дамжсан”, “цахим зарын” аргыг сонгох нь богино хугацаанд ашигтай мэт санагдавч урт хугацаанд хохирол дагуулдаг. Нэгэнт шилжүүлсэн мөнгийг буцаан авахад хүндрэлтэй, мөрдөн шалгах ажиллагаа удаан үргэлжлэх тохиолдол их.

Иймд Монгол Улсад цахим орчинд “Валют солино” гэх зарын дагуу залилуулсан тохиолдол нэмэгдэж буй энэ үед иргэн бүр санхүүгийн сахилга баттай байж, валют солилцоог баталгаатай замаар, зөвхөн албан ёсны байгууллагаар дамжуулан хийх нь зүйтэй. Хувь хүнээр, онлайнаар валют солихоос татгалзах нь өөрийгөө болон гэр бүлээ санхүүгийн эрсдэлээс хамгаалах хамгийн энгийн бөгөөд найдвартай арга юм.

"Баримт нэн тэргүүнд” сүлжээний олон нийтийн төлөөх бүтээл

Маргааш цахилгааны хязгаарлалт хийгдэх байршлуудтай танилц

zulaa — Mon, 02 Mar 2026 15:57:45 +0800

УБЦТС ТӨХК-аас 2026 оны 03 дугаар сарын 03-ны өдөр цахилгаан шугам тоноглолд засвар хийх тоймчилсон байршил, цагийн хуваарийг мэдээлж байна. Засварын ажлыг тухайн тоноглолыг хүчдэлээс бүрэн чөлөөлсний дараа хийдэг ажлын нөхцөлийг ойлгож, хүлээцтэй хандахыг хүсье.
Цаг агаарын байдлаас шалтгаалан хуваарьт өөрчлөлт орох тохиолдолд гэрээнд бүртгэгдсэн утасны дугаарт мэдээллийг хүргэх болно хэмээн УБЦТС ТӨХК-аас мэдээллээ.

Гадаадын 6 байгууллагын Монгол Улсад үйл ажиллагаа явуулах зөвшөөрлийг хүчингүй болгов

zulaa — Tue, 24 Feb 2026 12:46:54 +0800

Гадаадын иргэн, харьяатын газар нь олон улсын болон гадаад улсын төрийн бус байгууллагын салбар, төлөөлөгчийн газруудын үйл ажиллагаанд нь хяналт тавин ажиллажээ.

Энэ хүрээнд “Олон улсын болон гадаад улсын төрийн бус байгууллагын салбар, төлөөлөгчийн газарт Монгол Улсад үйл ажиллагаа явуулах зөвшөөрөл олгох, сунгах, хүчингүй болгох, үйл ажиллагаанд нь хяналт тавих журам”-ын дагуу дараах 6 байгууллагад олгосон Монгол Улсад үйл ажиллагаа явуулах зөвшөөрлийг хүчингүй болгосон байна.Үүнд:1. Бүгд Найрамдах Солонгос Улсад төвтэй “Рафаэл интернэйшнл” 2. Бүгд Найрамдах Чех Улсад төвтэй “Caritas Czech Republic”3. Бүгд Найрамдах Солонгос Улсад төвтэй “Ивээлт гараг”4. Америкийн Нэгдсэн Улсад төвтэй “Ла Миссион дэ Жуа” 5. Оросын Холбооны Улсад төвтэй “Силквей Ралли”6. Бүгд Найрамдах Солонгос Улсад төвтэй “Байгаль орчны мониторингийн үндэсний төв”

Монгол Улсад өнөөдрийн байдлаар 70 олон улсын болон гадаад улсын төрийн бус байгууллагын салбар, төлөөлөгчийн газар үйл ажиллагаа явуулж байгаа аж.

Сүлжээгүй бүс нутгийн малчдад цаг агаарын мэдээлэл хүргэх SOS төхөөрөмж гардууллаа

zulaa — Wed, 11 Feb 2026 10:26:29 +0800

Цаг уур, орчны шинжилгээний газрынхан “Эрт сэрэмжлүүлгийг хүн бүрд” зорилтын хүрээнд цаг агаарын аюулт болон гамшигт үзэгдлийн мэдээллийг малчид, иргэдэд шуурхай хүргэх ажлыг үе шаттай зохион байгуулж буйгаа мэдээллээ. Үүний нэг нь SOS төхөөрөмж аж. Тодруулбал, тус газрынхан НҮБ-ын Хөгжлийн хөтөлбөр, “Адапт” төслийн хүрээнд “ONDO space” компанитай хамтран сансрын хиймэл дагуулаар дамжуулан сүлжээгүй бүс нутгийн малчдад цаг агаарын мэдээ, мэдээллийг түргэн шуурхай хүргэх, эрсдэл тохиолдсон нөхцөлд тусламж дуудах зориулалт бүхий SOS төхөөрөмж хөгжүүлжээ. Эхний ээлжид уг төхөөрөмжөө Сүхбаатар аймгийн алслагдсан бүс нутагт амьдардаг найман өрхөд хүлээлгэн өгсөн байна. Тэд өмнө нь урьдчилан сэргийлэх мэдээлэлгүйгээс цаг агаарын хүндрэл, эрсдэлд цөөнгүй өртөж байжээ. Харин өдгөө ийм төхөөрөмжтэй болсноор өөрийн оршин суугаа сум, орон нутгийн гурван хоногийн цаг агаарын өдөр тутмын болон аюултай, гамшигт үзэгдлийн урьдчилсан мэдээг тогтмол авах боломжтой болов. Цаашид уг төхөөрөмжийг алслагдсан аймаг, сумын малчдад шат дараатай нийлүүлэх гэнэ.

Ташрамд дурдахад, Цаг уур, орчны шинжилгээний газрынхан цаг уурын урт хугацааны ажиглалтын өгөгдөл, улс орныг бүхэлд нь хамарсан мониторингийн сүлжээ, ган, зуд болон эрсдэлийн мэдээлэл, газрын доройтол, бэлчээрийн өөрчлөлтийг шинжлэх ухааны үндэслэлтэй үнэлэхэд суурь нөхцөл болох “Бэлчээрийн карбон шингээлтийн төсөл”-ийг Азийн хөгжлийн банктай хамтран хэрэгжүүлж буйгаа хэлсэн. Төслийг хиймэл дагуулын мэдээлэл, үндэсний уур амьсгалын өгөгдөлтэй уялдуулан, хяналт-тайлагнал-баталгаажуулалт хийх зэргээр өргөн хүрээнд хэрэгжүүлэх замаар бэлчээрийн менежментийг сайжруулах, хөрсний органик карбоныг нэмэгдүүлэх, экосистемийн тогтвортой байдлыг дэмжинэ гэв.

О.Ундрах

https://www.unuudur.mn/a/280254